កុំទាន់អូសរំលង ប្រសិនបើអ្នកកំពុងមានបំណងចង់លក់ផលិតផលអនឡាញ!
E-Commerce គឺជាដំណើរការទិញលក់ផលិតផល ឬសេវាកម្ម តាមរយៈអ៊ីនធើណេត នៅលើគេហទំព័រ ឬកម្មវិធីទូរសព្ទដៃ (App) ដែល​អ្នកអាចលក់ដូរទំនិញ ទិញទំនិញ ទូទាត់ប្រាក់ និងដំណើរការដឹកជញ្ជូនទៅដល់ដៃអ្នកទិញ ដោយមិនចាំបាច់ជួបមុខអ្នកលក់ដោយផ្ទាល់ឡើយ។ អាជីវកម្មប្រភេទ  E-commerce ថ្វីត្បិតតែងាយស្រួល និងទាន់សម័យ ក៏ប៉ុន្ដែតម្រូវឲ្យមានជំនាញបច្ចេកវិទ្យាខ្លះ ដើម្បីដំណើរប្រតិបត្តិការនានា ជាពិសេសសម្រាប់អ្នកលក់ផ្ទាល់តែម្តង។ អ្នកអាចចាប់ផ្ដើមអាជីវកម្មបែប E-Commerce តាមរយៈការបង្កើតគេហទំព័រថ្មីមួយជារបស់ខ្លួន ឬដាក់លក់ក្នុងគេហទំព័រដែល​មានស្រាប់។ 

ស្របជាមួយភាពងាយស្រួលដូចបានរៀបរាប់ខាងលើ ការលក់ផលិតផល ឬសេវាកម្មតាមរយៈ E-Commerce ក៏ផ្ដល់ផលវិបាកមួយចំនួនដែរ។ ខាងក្រោមគឺជា គុណសម្បត្តិ​ និងគុណវិបត្តិខ្លះៗ ដែល​អ្នកគួរដឹង៖

#គុណសម្បត្តិ​

-ចំណេញពេលវេលា ដោយសារមិនចាំបាច់ចំណាយពេលក្នុងការចរចាជាមួយអតិថិជន

-លក់បាន ២៤ ម៉ោង (ម៉ោងគេងក៏លក់បាន)

-សន្សំកម្លាំងពលកម្មនៃប្រត្តិបត្តិការនីមួយៗ សូម្បីតែពេលទូទាត់ប្រាក់

-មិនចំណាយលើទីតាំងលក់ ដោយសារអ្នកអាចលក់បានគ្រប់ទីកន្លែងដែលមានអ៊ីនធើណេត

-ការលក់មានភាពទូលំទូលាយ មិនថាក្នុងតំបន់ ឆ្លងខេត្ត ឬសូម្បីប្រទេស 

-ផ្ដល់ឱកាសសម្រាប់អ្នកមានដើមទុនតិច​ និងអ្នកលក់ដូរដែលត្រូវការចំណូលបន្ថែម

#គុណវិបត្តិ

-មានការប្រកួតប្រជែងលើតម្លៃ ដោយសារអ្នកបានតាំងតម្លៃលើផលិតផល

-បញ្ហាអសុវត្ថិភាពតាមប្រព័ន្ធអេឡិចត្រូនិច

-ប្រើពេលច្រើនពេលត្រូវផ្លាស់ប្ដូរអីវ៉ាន់ និងការប្ដូរលុយត្រឡប់ទៅវិញទៅមក

-បើដាក់លក់លើគេហទំព័រធំៗ អ្នកនឹងត្រូវចំណាយលើសេវាកម្មប្រតិបត្តិការដោះដូរទំនិញទាំងនោះ

 

ជារួម ការធ្វើអាជីវកម្មតាមបែប E-commerce នេះ ផ្ដល់ភាពងាយស្រួលច្រើនជាងផលលំបាក ទាំងចំពោះអ្នកលក់ និងអ្នកទិញ។ ជាពិសេស ក្នុងពេលបច្ចុប្បន្នដែល​គ្រប់យ៉ាងសឹងតែពឹងផ្អែកលើបច្ចេកវិទ្យា ការធ្វើអាជីវកម្មតាមបែប E-commerce ផ្ដល់ឱកាសឲ្យអ្នកជោគជ័យច្រើនក្នុងអាជីវកម្ម ឬរកចំណូលបន្ថែមបាន៕
------------------------
អត្ថបទនេះនាំមកជូនដោយ Khmer Enterprise - សហគ្រិនខ្មែរ
✨ Join us on Telegram Channel: https://t.me/+w84MlB8KVKVjMDBl
🔰 សហគ្រិនខ្មែរមានចក្ខុវិស័យក្លាយជាថ្នាលជាតិសម្រាប់ការលើកកម្ពស់គ្រប់សកម្មភាពរបស់វិស័យសហគ្រិនភាព។

#KhmerEnterprise #KE #Cambofinance #Content #Article #PublicRelations #KE_PR #PR

Ref:
https://www.businessnewsdaily.com/15858-what-is-e-commerce.html